नेकपा (एमाले) रुपन्देहीले पार्टीको वडा केन्द्रित अभियानलाई जोड्दै चैत ११ गते ११ बजे एकै पटक जिल्लाका १५५ वटै वडाहरूमा एकसाथ प्रतिगामी कुप्रयासका विरूद्ध जनसचेतना कार्यक्रम सञ्चालन गर्ने भएको छ । 

पार्टी केन्द्रको निर्देशन बमोजिम रुपन्देही जिल्ला कमिटीको २०८१ चैत्र ८ गते बसेको तेस्रो पूर्ण बैठकले ११ गते सचेतना कार्यक्रम गर्ने निर्णय गरेको हो । 

बैठकले सङ्घीय लोकतान्त्रिक गणतन्त्रका पक्षमा नागरिक समाज र विभिन्न पक्षसँग अन्तर सम्वाद कार्यक्रम आयोजना गर्ने, चैत १८ गते बुटवल–बेलहिया रुटमा वृहत मोटरसाइकल ¥याली गर्ने निर्णय गरेको छ । उक्त ¥याली ब्यवस्थापनका लागि जिल्ला उपाध्यक्ष हितराज पन्थीको संयोजकत्वमा उपसचिव क.बाबुराम पन्थी, क्षेत्रीय कमिटीका संयोजक कमरेडहरु, राष्ट्रिय युवा संघ नेपाल, अनेरास्ववियु लगायतका जनसंगठनका जिल्ला र सो भन्दा माथिका नेताहरु रहेको कमिटी निर्माण गरिएको छ । 

त्यस्तै एमाले रुपन्देहीले चैत २९ गते बुटवलमा बिशाल जनसभा आयोजना गर्ने भएको छ । जनसभाको तयारीका लागि जिल्ला सचिव चित्रबहादुर कार्की संयोजक र सदस्यहरुमा उपसचिव क.बाबुराम पन्थी, क्षेत्रीय संयोजकहरु, प्रदेश क्षेत्रका संयोजकहरु, पालिका कमिटीका अध्यक्षहरु, जनसंगठनका जिल्ला अध्यक्षहरु र पार्टी जिल्लाबाट तोकिएका इन्चार्जहरु रहेको ब्यवस्थापन कमिटी निर्माण गरेकोे छ ।  

बैठकले स्ववियु निर्वाचनमा निर्वाचित सबैलाई बधाई दिनुका साथै स्ववियु निर्वाचनमा अनेरास्ववियुका उम्मेदवारलाई जिताउन लाग्नुहुने पार्टीका नेता, पार्टी कमिटी र अनेरास्ववियुका सम्पूर्ण नेता र नेतृत्वलाई विशेष धन्यवाद ज्ञापन गर्नुका साथै आभार समेत प्रकट गरेको थियो । 

नेकपा (एमाले) रुपन्देही जिल्ला कमिटीको तेस्रो पूर्ण बैठक २०८१ चैत्र ८ गते शुक्रवार बुटवलमा कमिटीका अध्यक्ष यज्ञ गैरेको अध्यक्षता, सचिव चित्रबहादुर कार्कीको सञ्चालन तथा पार्टीका पोलिटब्युरो सदस्य एवं रुपन्देही इन्चार्ज लिला गिरीको प्रमुख आतिथ्यतामा सम्पन्न भएको थियो । बैठकमा पोलिटब्यरो सदस्य दधिराम न्यौपाने, केन्द्रीय कमिटी सदस्यहरु गोमा आचार्य, सावित्रादेवि अर्याल, केन्द्रीय आयोगका पदाधिकारी तथा सदस्यहरु, केन्द्रीय सल्लाहकार परिषदका सदस्यहरु, लुम्बिनी प्रदेश कमिटीका सदस्यहरु आतिथ्यता रहेको थियो ।